Дзяўчыну з Беларусі прадалі на органы ў М’янме і спалілі цела — яна паехала працаваць у Тайланд і аказалася ў скам-цэнтры, дзе не прынесла дастаткова грошай уладальнікам як «мадэль», піша Mash.
Паводле звестак тэлеграм-канала, беларуска шукала працу за мяжой. Яна прыляцела на сумоўе ў Бангкок, але замест подыума дзяўчыну вывезлі ў М’янму і зрабілі рабыняй. Яна мусіла «абслугоўваць гаспадароў і разводзіць багацеяў на грошы».
Сувязь з ёй знікла 4 кастрычніка.
«Спачатку за яе цела запатрабавалі ў родных 500 тысяч даляраў, а праз некалькі дзён сказалі, што загінулую крэміравалі. Цяпер сям’я вядзе перамовы пра вяртанне праху на радзіму», — адзначае Mash.
Пра тое, што ў М’янме шукаюць зніклую беларускую, пазней паведамілі і ў Міністэрстве замежных справаў Беларусі. Там адзначылі, што сувязь з дзяўчынай, паводле яе маці, знікла 4 кастрычніка.
Дакладна вядома, што беларуска вылецела ў Янгон (М'янма) з Бангкока (Тайланд) 20 верасня. Да мерапрыемстваў падключаныя замежнапалітычныя і сілавыя ведамствы дзвюх краін, апараты ганаровых консульстваў Беларусі ў Янгоне і Бангкоку, заявілі ў МЗС.
Раней паведамлялася, што ў такую ж сітуацыю трапіла расіянка — жыхарка Чыты. Яна трапіла ў Тайланд праз тых самых пасярэднікаў — менеджара, агента і перавозчыка. Аднак калі дзяўчыну везлі на продаж у М’янму, яе перахапілі мясцовыя сілавікі і змясцілі ў лагер пры іміграцыйным цэнтры. Цяпер дыпламаты рыхтуюць дакументы для яе дэпартацыі.