Правыя актывісты з «Канфедэрацыі» і «Нацыянальнага руху» Польшчы заклікалі адкрыць хаця б адзін дадатковы пункт пропуску на мяжы з Беларуссю, каб падтрымаць мясцовую эканоміку і прывабіць турыстаў і інвестараў. Між тым у МУС краіны заявілі, што адкрыюць мяжу, «калі складуцца спрыяльныя абставіны», перадае Radio Białystok.
Паводле прадпрымальнікаў і правых актывістаў з памежнага Падляшскага ваяводства, закрыццё пунктаў пропуску на мясцовым участку мяжы з Беларуссю наносіць адчувальную шкоду рэгіёну. Яны папрасілі адкрыць хаця б адзін памежны пераход.
Аўтары ініцыятывы падкрэсліваюць, што сітуацыя выглядае дзіўна на фоне суседняга Люблінскага ваяводства, дзе адкрыты, у прыватнасці, адзіны пасажырскі пункт пропуску на мяжы з Беларуссю.
«Ад гэтага пакутуе ўвесь рэгіён, бо турысты, якія едуць на шопінг, перасякаюць мяжу ў Тэрэспалі, робяць пакупкі ў Бяла-Падлясцы або адразу едуць у Варшаву, а Беласток пры гэтым абмінаюць. Між тым да закрыцця пункта пропуску ў Баброўніках штогод праз яго праходзіла больш за мільён чалавек, — заявіла Эвеліна Грыгатовіч з бізнес-асацыяцыі «Аб'яднаны Усход».
Паводле ацэнак прадпрымальнікаў, страты Падляшскага ваяводства ад закрытай мяжы складаюць каля аднаго мільярда злотых (больш за 270 млн даляраў) на год.
Пры гэтым 15 кастрычніка, падчас візіту на мяжу з Беларуссю, міністр унутраных справаў і адміністрацыі Польшчы Марцін Кервіньскі заявіў, што мяжа будзе адкрытая, як толькі складуцца «спрыяльныя для гэтай акалічнасці».
Нагадаем, 9 верасня 2025 года прэм’ер-міністр Польшчы Дональд Туск абвясціў пра рашэнне цалкам закрыць мяжу з Беларуссю апоўначы з 11 на 12 верасня. Ён патлумачыў гэты крок «ростам колькасці правакацый з боку Расіі і Беларусі» і сумеснымі вайсковымі вучэннямі «Захад-2025». Мяжа была закрытая на няпэўны тэрмін.
25 верасня 2025 года Польшча аднавіла працу памежных пераходаў «Брэст — Тэрэспаль» (пасажырскі), «Казловічы — Кукурыкі» (грузавы), а таксама чыгуначных грузавых пераходаў «Кузніца Беластоцкая — Гродна», «Семянуўка — Свіслач» і «Тэрэспаль — Брэст».
Польскі бок закрыў пункт пропуску «Баброўнікі» (з беларускага боку — «Бераставіца») у 2023 годзе, а «Брузгі» былі закрытыя восенню 2021 года пасля спробаў нелегальнага перасячэння мяжы мігрантамі.
Чытайце таксама
