Беларусы «кампенсуюць» наўпрост толькі 30% ад кошту капрамонту шматкватэрных дамоў. Пра гэта заявіў намеснік міністра жыллёва-камунальнай гаспадаркі Андрэй Рамашка ў эфіры СТБ. Аднак чыноўнік змаўчаў пра важную дэталь — расказваем.
У апошнія пяць гадоў амаль у два разы выраслі тэмпы работ па капітальным рамонце, заявіў Андрэй Рамашка.
— Мы выйшлі на ўзровень больш чым 3 млн квадратных метраў за год. Раней мы рабілі 1,6 максімум… Пра што кажуць гэтыя лічбы? Штогод рамантуецца прыкладна 3% ад усяго шматкватэрнага жылфонду, што эксплуатуецца ў краіне, — прывёў статыстыку намеснік міністра.
З яго заявы вынікае, што правесці капрамонт усіх шматпавярховак, дзе жывуць людзі, удасца больш чым за 33 гады. Пакуль працэс завершаць, работы трэба будзе пачынаць па новым коле. Праводзіцца такі рамонт мусіць кожныя 15−25 гадоў.
Акрамя гэтага, Андрэй Рамашка заявіў, што каля 70% ад кошту ўсяго капітальнага рамонту ў краіне фінансуецца з бюджэту. «Штомесячныя адлічэнні насельніцтва кампенсуюць толькі 30% выдаткаў», — падкрэсліў чыноўнік.
Пры гэтым ён змаўчаў пра тое, што бюджэт краіны практычна цалкам фармуецца за кошт падаткаў насельніцтва і бізнесу. Сёлета гэта больш за 85% даходаў казны.
Кошт капітальнага рамонту складае каля 100 млн рублёў, дадаў прадстаўнік Мінжылкамгаса. Аднак ён не ўдакладніў, маюцца на ўвазе выдаткі за год ці нешта іншае.
Як расказвала раней «Люстэрка», выдаткі на капрамонт могуць адрознівацца, у тым ліку ў залежнасці ад спісу неабходных работ і падрадчыка. Да таго ж у асобных выпадках ўклад насельніцтва наўпрост, а не праз выплату падаткаў у казну, істотна вышэйшы. Так, сёлета быў запланаваны пачатак капрамонту ў доме на вуліцы Будаўнікоў у Віцебску. Першапачаткова планавалася выдаткаваць на гэтыя працы і закупку абсталявання да 2 млн 655 тыс. рублёў. З іх 700 тыс. рублёў збіраліся ўзяць з гарадскога бюджэту, астатняе — адлічэнні людзей і арандатараў. То-бок людзі наўпрост мусілі прафінансаваць больш за 74% кошту работ.
У некаторых выпадках сапраўды вялікая частка сумы дзе з бюджэту.
